В лѣто 6860. Рукописание Магнуша, короля свѣйскаго. Се язъ, князь Магнушь, король свѣйский, нареченый въ святомь крещеньи Григорий, отходя сего свѣта, пишу рукописание при своемъ животѣ, а приказываю своимъ дѣтемъ, и своей братьи, и всей земли Свѣйской: не наступайте на Русь на крестномъ цѣлованьи, занеже намъ не посабляется.
Первие сего подьялъся местерь Бельгерь[1] и шелъ в Неву, и срѣте его князь великий Александръ Ярославич на Ижерѣ-рѣцѣ,[2] и самого прогна, а рать его поби.
И потом брат мой Маскалка, вшедъ в Неву, городъ постави на Охтѣ-рѣцѣ[3] и посадникы своя посади съ множествомъ нѣмець, а самъ поиде за море. И пришед великий князь Андрѣй Александрович, город взя,[4] а намѣстники и немѣць поби.
И потом было намъ розмирие с Русью[5] 40 лѣт.
И потом за сорок лѣт с великимъ княземъ Юрьемъ Даниловичемъ взяли есмя миръ вѣчный[6] на Невѣ, земли есмя и водѣ учинили роздѣлъ, кому чѣм владѣти, и грамоты есмя пописали и попечатали.
И потом за 30 лѣт,[7] язъ, Магнушь-король, того не порядя, поднялся есмь съ всею землею Свѣйскою, и вшед в Неву, и взя город Орѣховъ и намѣстники есмь свои в городѣ посадилъ, и съ ними нѣколко силы моей оставих, а самъ есмь пошелъ за море. И потомъ новогородци пришед, город свой взяли, а намѣстниковъ и немѣць побили, которыи сидѣли в городѣ.
И язъ, того не порядя, за одинъ годъ, опять пошелъ к Орѣхову[8] съ всею Свѣйскою землею; и стрѣти мя вѣсть, что новогородци под Орѣховцемъ. И язъ опять пошел под Копорью,[9] и под Копорьею есмь ночь ночевал; и вѣсть ко мнѣ пришла: новогородци на украѣ земли. И язъ послышевъ, побѣглъ за море; ино в валу парусовъ не знати; и въста буря силна, и потопи рати моей много на усть Неровы-рѣкы.[10] И пошелъ есмь в землю свою съ останкомъ рати.[11]
И от того времени наиде на нашу землю Свѣйскую погыбель: потопъ, моръ, голодъ и бысть сѣча межди собою. У самого у мене Богъ отъя умъ, и сѣдѣх в полате год прикованъ къ стѣнѣ чепию желѣзною и задѣланъ есмь был в полатѣ.
И потомъ приѣхалъ сынъ мой Сакунъ из Мурманьской земли,[12] и выня мя ис полаты, и повезе в землю свою Мурманьскую. И удари на мене опять потопъ, корабли мои и люди мои истопи вѣтръ, а сам сътворихся на днѣ корабленемъ, и с торцнемъ[13] пригвоздихся, три дни и три нощи. И по Божию повелѣнию, принесе мя вѣтръ под манастырь святаго Спаса в Полную рѣку,[14] и сняху мя со дьскы черньци, и внесоша мя в манастырь и постригоша мя в черньци и въ скыму;[15] и сътвори мя Господь три дни и три нощи жива. А все то мене Богъ казнилъ за мое высокоумие, что есмь наступалъ на Русь на крестномь целовании.
И нынѣ приказываю своимъ дѣтем и своей братьи и всей земли Свѣйской: не наступайте на Русь на крестномъ целовании; а кто наступить — на того огнь и вода, имже мене Богъ казнилъ. А все то створилъ Богъ къ моему спасению.
http://lib.pushkinskijdom.ru/Default.aspx?tabid=4975
